СВИНСКА ЧУМА СЕ ШИРИ ВО СРБИЈА: Потврдена на речиси 500 фарми, еутанизирани повеќе од 10.500 свињи

Властите предупредуваат дека вирусот лесно се шири

Африканската свинска чума продолжува да се шири во Србија, каде што досега е потврдена на 496 фарми во 18 општини и осум административни области. Од 9 јули, на заразените фарми угинале 1.015 свињи, а 10.515 животни биле еутанизирани за да се спречи натамошното ширење на болеста.

Во изминатите два месеци дополнително биле еутанизирани повеќе од 10.000 свињи на помали фарми во Мачванскиот округ, Срем и во подрачјето на Белград.

Во борбата против болеста се вклучени повеќе министерства, државни компании, ловни друштва и општински администрации.

Надлежните предупредуваат дека поединечни сопственици на фарми неправилно ги отстрануваат угинатите животни, фрлајќи ги надвор од фармите, што дополнително го зголемува ризикот од ширење на инфекцијата.

Вирусот лесно се пренесува, вакцина сè уште нема

На состанокот посветен на состојбата присуствувале претставници на Министерството за одбрана, Министерството за внатрешни работи, сообраќајната полиција, Ветеринарната управа, Шумската управа, „Србијашуме“, „Војводинашуме“, градоначалници, раководители на окрузи и претставници на ловните здруженија.

Жаришта на африканската свинска чума се регистрирани во Сремскиот и Мачванскиот округ, градот Белград, дел од Колубарскиот округ и Орашје кај Велика Плана. Заразата е потврдена и во Поморавскиот и Шумадискиот округ, додека регистрацијата е во тек во Борскиот округ.

Министерот предупреди дека африканската свинска чума е исклучително опасен вирус кој многу лесно се пренесува и затоа е неопходно целосно вклучување на сите надлежни служби.

„Дури стигнавме и до печурки и вргањ, бидејќи вирусот многу лесно се пренесува. Присутен е на секој чекор и се крие од сите страни. Нема вакцина и затоа мора да направиме сè за да го спречиме неговото ширење“, рече министерот.

Апел да се ограничи движењето во шумските подрачја

Учесниците на состанокот апелираа да се намали непотребното движење, особено во шумските подрачја каде што живеат дивите свињи, кои се сметаат за еден од главните извори за ширење на болеста.

Африканската свинска чума ги погодува домашните и дивите свињи, но не претставува опасност за луѓето. Вирусот се пренесува преку контакт со заразени животни, како и преку контаминирана храна, опрема, облека и транспортни средства.