„Тајмс“ објавува: Новиот лидер на Иран е во кома

Новиот врховен лидер на Иран, Моџтаба Хамнеи, е неспособен да ја извршува функцијата и е на лекување во светиот град Ком, според проценка на разузнавањето во која се вели дека тој е неспособен да ја води земјата.

Дипломатскиот меморандум, за кој се вели дека е базиран на американски и израелски разузнавачки информации и доставен до сојузниците од Заливот, наведува дека Хамнеи, син на убиениот долгогодишен лидер Али Хамнеи, е во несвест и прима лекување за сериозна медицинска состојба, објавува „Тајмс“.

Мемондумот, кој го виде „Тајмс“, за прв пат ја открива локацијата на новиот врховен лидер. Градот Ком, кој се наоѓа 140 километри јужно од Техеран, се смета за свет во шиитскиот ислам.

„Моџтаба Хамнеи е на лекување во Ком. Тој е во сериозна состојба и не е во можност да учествува во донесувањето одлуки на режимот“, се вели во документот.

Според белешката, телото на постариот Хамнеи се подготвува и за погреб во Ком, седиштето на шиитската свештеничка моќ и религиозната престолнина на земјата. Разузнавачките агенции ја набљудувале подготовката на „местото за изградба на голем мавзолеј во Ком“ за „повеќе од една гробница“, што сугерира дека други членови на семејството, а можеби и самиот Моџтаба, би можеле да бидат погребани покрај покојниот врховен лидер.

Се верува дека американските и израелските разузнавачки агенции веќе некое време знаат за локацијата на помладиот Хамнеи, но информациите не се објавени. Американската агенција за национална безбедност, која е одговорна за обработка на глобални разузнавачки информации, е контактирана во врска со белешката, како и иранската мисија во Вашингтон, која се наоѓа во амбасадата на Пакистан.

Лидерот што никој не го видел

Иран потврди дека новиот врховен лидер е ранет во истиот воздушен напад во кој беа убиени неговиот татко, мајка, сопруга Захра Хадад-Адел и еден од неговите синови на 28 февруари, првиот ден од војната што оттогаш го зафати регионот. Помладиот Хамнеи не е виден јавно, ниту пак дал изјава откако започна конфликтот, и покрај тоа што беше избран да го наследи својот татко на почетокот на март.

Оттогаш, две изјави што му се припишуваат на 56-годишниот Хамнеи беа прочитани на иранската државна телевизија. Вчера, истиот канал објави и видео, создадено од вештачка интелигенција, на кое се гледа како лидерот влегува во воена соба и анализира мапа на израелскиот нуклеарен објект во Димона.

Недостатокот на аудио од неговиот глас додава тежина на непотврдените извештаи дека тој останува во критична состојба. Додека иранските власти инсистираат дека новиот врховен лидер „управува“ со земјата, претходните извештаи веќе укажуваа на неговата лоша здравствена состојба. Опозициските групи тврдеа дека тој е лекуван во кома во болница, додека други рекоа дека претрпел скршена нога и повреди на лицето.

Прашањето за вистинската моќ во Иран

Неговата наводна неспособност покренува прашања за статусот на Хамнеи во земја каде што врховниот лидер е апсолутен политички и религиозен авторитет. Тоа би можело да ги поттикне шпекулациите дека Исламската револуционерна гарда (ИРГЦ) всушност ја задржува контролата врз земјата и дека Хамнеи е марионета или фигура без вистинска моќ. Американскиот претседател Трамп тврди дека е во разговори со други ирански функционери, но јасно стави до знаење дека не комуницира со врховниот лидер.