Министерот Таравари: Состојбата на сите пациенти е стабилна, дел од нив ќе бидат испишани

Сите пациенти кои се лекуваат во земјата и во странство се во стабилна и добра состојба, а повеќето од нив покажуваат подобрување, изјави денеска министерот за здравство Арбен Таравари.

Од вкупно 20 критични пациенти, 10 се во потешка состојба, но се стабилни и надвор од животна опасност.

Бројка на хоспитализирани пациенти

Во Македонија моментално се лекуваат 72 пациенти, а во странство 101.

Од оние што се лекуваат во земјава:
34 се хоспитализирани во Клиничкиот центар
15 во ГОБ „8 Септември“
11 во Градската општа болница
1 пациент во болницата во Штип

Во приватните клиники:

  • „Систина“ згрижува 7 пациенти
  • „Жан Митрев“ има 4 пациенти

Тројца пациенти веќе биле испишани вчера, а уште тројца ќе бидат испишани утре.

Префрлање на пациенти во странство

Министерот Таравари изјави дека вчера биле испратени помал број пациенти во странство, а за денеска има понуди од повеќе држави.

„Можеби ќе испратиме уште 10 пациенти, а можеби и не. Ќе процениме според состојбата“, рече Таравари.

Од идната недела, Министерството ќе известува за бројот на пациенти кои ќе продолжат со лекување дома, како и за оние кои ќе се вратат од странство.