Таравари преку ноќ го прегази се она за кое се залагаше, а сега продолжува чекор понапред. „Ако биде загрозена европската перспектива на Македонија, тогаш можно е да се случи радикализација на албанските партии во земјава“, предупреди лидерот на Алијанса за Албанците, Арбен Таравари.
Тој во интервју за ТВ Шења рече дека неможноста да се отвори Уставот и да се внесат Бугарите во Преамбулата би направило да влеземе во еден маѓепсан круг од кој нема да има излез.
– Можно е да се случи радикализација на албанските партии ако биде загрозена европската перспектива на Северна Македонија. Може да пораснат фрустрациите кај Албанците и може да се појават нови идеи за реорганизација на државата. Ќе влеземе во еден маѓепсан круг од кој нема да можеме да излеземе – изјави Таравари, пренесе порталот Зум.
Лидерот на Алијанса за Албанците упати критики и кон опозициската ВМРО-ДПМНЕ за која вели дека има нејасна визија за европската иднина на земјава.
Тој го повика лидерот на најголемата опозициска партија Христијан Мицкоски да биде искрен и да каже што ќе биде со Македонија ако годинава не почне преговори со ЕУ поради противењето за внес на Бугарите во Уставот.