Челзи официјално потврди големи промени во својата сопственичка структура, поточно дека Тод Боли повеќе не е сопственик на лондонскиот клуб.
Инвестицискиот фонд „Clearlake Capital Group“ ги презеде сопственичките удели што ги поседуваа Тод Боли и Марк Волтер, со што ја презеде целосната контрола врз лондонскиот клуб.
Во соопштението на клубот се наведува дека оваа трансакција го означува заминувањето на Боли од функцијата претседател, додека швајцарскиот милијардер Хансјорг Вис ќе остане клучен акционер и партнер во рамките на сопственичката група.
Вреди да се потсетиме дека Боли и „Clearlake“ го предводеа историското преземање на Челзи во 2022 година, во период на голема политичка и финансиска неизвесност за клубот. Оттогаш, тие заеднички инвестираа огромни ресурси во машкиот и женскиот тим, во младинската академија и во модернизацијата на тренинг-центарот „Кобем“.
Тод Боли се повлекува, истакнувајќи дека го остава клубот во одлична позиција за следната фаза од развојот и за освојување трофеи.
„Чест ми беше да бидам претседател на Челзи. Им благодарам на сите што помогнаа да се обезбеди светла иднина за клубот, вклучително и на Премиер лигата, персоналот, играчите и нашите верни навивачи. Уверен сум во продолжување на успесите под водство на ‘Clearlake’“, изјави Боли во својата проштална порака.
Ко-основачите на „Clearlake“, Бехдад Егбали (со иранско потекло) и Хозе Е. Фелисијано (со порториканско потекло), му се заблагодарија на Боли за партнерството и досегашниот придонес. Тие нагласија дека, како единствени сопственици, остануваат фокусирани на понатамошни инвестиции во спортскиот напредок, развојот на играчите и долгорочниот успех на тимот. На крајот, клубот упати јасна порака до навивачите дека оваа промена во сопственоста нема да донесе апсолутно никакви промени во секојдневното работење на Челзи, во актуелното раководство или во спортската стратегија.