Министерот Панче Тошковски најави имплементација на системот „сејф сити“. Станува збор за нов пристап за сообраќајни прекршоци преку СМС известувања и камери.
Транспарентност и ефикасност во сообраќајниот систем
„Како министер за внатрешни работи, можам да потврдам дека во рамките на техничката влада, а особено во оваа, која активно работи на решавање на наследените проблеми, мора да признаеме дека сообраќајниот систем е нефункционален. Оваа состојба мора да се промени во интерес на граѓаните на Македонија,“ изјави Тошковски.
Проблеми со нефункционален систем
- „Со години наназад, овој систем пропаѓа, а сега сме исправени пред ситуација во која тешките сообраќајни несреќи заслужено ја привлекуваат вниманието на јавноста. Народот има целосно право да биде револтиран, бидејќи очигледните недостатоци на системот се катастрофални, а логично е дека бара конкретни решенија,“ истакна Тошковски.
Имплементација на „сејф сити“
Министерот Панче Тошковски најави имплементација на проектот
„Од самиот почеток на оваа Влада, активно се работи на воспоставување на „сејф сити“ системот, кој ќе обезбеди одржливо решение за долготрајните проблеми. Овој систем ќе обезбеди објективно евидентирање на секој сообраќаен прекршок – било да се работи за пребрзо возење, паркирање на забрането место или управување со нерегистрирано возило. Врз основа на тие податоци, ќе се преземаат соодветни мерки,“ додаде Тошковски.
За оваа тематика нашиот медиум објави и претходната недела. Повеќе може да прочитате од линкот во продолжение:
„Пари веднаш ќе ви бидат повлечени од сметка“: Познато е на како ќе функционираат камерите во Скопје
Судската пракса – најголем предизвик
„Главниот проблем во имплементацијата на проектот ќе биде судскиот систем. Согласно уставните одредби, секој прекршок што подразбира одземање возачка дозвола или изрекување значителна глоба мора да помине низ судска постапка. Ова не може да се избегне, а со оглед на тоа што имаме 19.000 лица кои никогаш не положиле возачки испит, јасно е дека ситуацијата е алармантна и дека ваквите бројки се сериозен проблем кој трае со години,“ посочи Тошковски.
Поставување камери на „црни точки“
„Владата одвои значителни средства за овој проект, кој нема да биде ограничен само на Скопје, Куманово и Тетово, туку ќе се прошири низ целата држава. Жителите на Битола, Струга и Велес заслужуваат модерен систем кој ќе го подигне нивото на сообраќајната култура. Интензивно работиме на поставување камери на критичните локации – најмногу на „црни точки“, идентификувани врз основа на податоци од минатите години. Кога возачите ќе бидат свесни дека секој нивен прекршок е автоматски евидентиран, сигурен сум дека ќе размислат двапати пред да возат со тројно поголема брзина од дозволената,“ рече Тошковски.
Судските пресуди и селективната примена на законите
„Постојат сериозни проблеми во судската пракса, особено во одлуките за сообраќајни прекршоци што резултираат со трагични последици. Иако не би требало да коментирам конкретни пресуди, морам да нагласам дека имаме случаи во кои лица предизвикале сообраќајна несреќа со фатални последици, а добиле казна од само шест месеци затвор. Ова е нешто што мора да се промени,“ изјави Тошковски.
СМС известувања за прекршители
- „Воведуваме иновативен пристап за комуникација со прекршителите. Наместо по неколку години, тие ќе добиваат СМС известување во рок од 24 часа по сторениот прекршок. Во пораката ќе биде вклучен линк со детални информации и фотографија од моментот на прекршокот, со што прекршителот ќе може веднаш да ја потврди направената грешка,“ кажа Тошковски.
Спасување човечки животи
- „Со имплементација на сите предложени решенија, вклучувајќи не само законски измени, туку и подобрување на инфраструктурата – како пешачки премини, раскрсници и зелени бранови – ќе постигнеме значително подобрување. Но, на крајот, најважно е дека овие мерки нема да бидат само бројки во статистиките, туку ќе значат спасени човечки животи,“ заклучи Тошковски.
Многу е веројатно дека со имплементацијата на системот „сејф сити“ значајно ќе се намали бројот на прекршоци во сообраќајот.