Министерот Панче Тошковски со нови детали за системот „Сејф сити“
Министерот за внатрешни работи, Панче Тошковски, изнесе нови информации за резултатите и функционирањето на системот „Безбеден град“, говорејќи на промоцијата на 120 нови службени возила за полицијата.
Намалени повреди благодарение на побавно возење
Тошковски им се заблагодари на граѓаните, посочувајќи дека смирувањето на сообраќајот во Скопје директно придонело за намалување на бројот на повредени лица кои се згрижуваат во Центарот за трауматологија. Според него, од стартот на проектот е забележано значително подобрување во почитувањето на сообраќајните правила, што резултирало со драстично намалување на опомените и конкретно намалување на бројот на повредени.
Зошто системот алармира на 50, а не на 57 км/ч
Министерот појасни дека целта на системот е возење во рамки на дозволената брзина. Тој се повика на светска статистика, нагласувајќи дека при брзина од 30 км/ч, од 10 повредени лица гинат две, додека при брзина од 50 км/ч – од 10 повредени гинат осум.
„Доколку ги почитуваме законите, спасуваме животи“, истакна Тошковски.
Казнувањето следува, новите возила не се дел од системот
Тошковски најави дека системот наскоро ќе биде адаптиран и јавноста ќе биде навремено информирана за почетокот на казнувањето за прекршоците што ќе бидат предмет на санкционирање. Воедно, тој појасни дека новите полициски возила кои денеска беа промовирани нема да се користат во рамки на проектот „Безбеден град“, туку за детектирање сообраќајни прекршоци ќе се користат други, специјално наменети возила, особено за неправилно запирање и паркирање.