Експлозија во центарот на Белград
Македонскиот државјанин и модел Мартин Сипковски (21) загина во експлозија што се случи минатата недела во стан на улицата Косовска, во самиот центар на Белград, дознава српскиот „Курир“. Според извештаите, Вишото јавно обвинителство во Белград го сослушало 26-годишниот Филип В. под сомнение дека на 30 септември нелегално набавил и потоа пренел експлозивен материјал „пентрит“, кој му го предал на Сипковски истиот ден.
Несреќно активирање на експлозивот
Како што утврдиле истражните органи, Сипковски следниот ден, на 1 октомври, околу 21.45 часот, несмасно го активирал експлозивот и починал на самото место. Обдукцијата потврдила дека станува збор за македонски државјанин кој, според неофицијални информации, немал криминално досие. Изворите додаваат дека експлозивната направа била наменета за ликвидација на лице со криминално досие, поврзано со навивачки групи.
Од ракомет до модните писти
Според пишувањата на медиумите, Мартин Сипковски бил поранешен ракометар на „Вардар“. Тој по повреда на вратот се посветил на манекенството. Бил првиот Македонец што потпишал договор со престижната турска агенција „Даман“ од Истанбул. Со висина од 186 сантиметри и тежина од 70 килограми, студирал на Факултетот за бизнис и менаџмент во Скопје и важел за млад талент кој ветувал голема модна кариера. Патувањето во Истанбул требало да му послужи за кастинзи во неколку познати модни куќи и брендови.
Истрагата под водство на Вишото јавно обвинителство во Белград е сè уште во тек. Надлежните органи ги утврдуваат сите околности поврзани со трагичната експлозија.