ТРАГЕДИЈА ВО ИСТАНБУЛ: Мајка и две деца починаа, таткото во критична состојба по сомнежи за труење

Мајка и две мали деца го загубија животот, а таткото се наоѓа на интензивна нега. Трагедијата го затекна семејството од Хамбург за време на престојот во хотел во Истанбул. Првите сомнежи упатуваа на труење од полнети школки купени на улица, но новите информации што ги објавуваат повеќето медиуми сега ја насочуваат истрагата кон можноста за користење нелегални инсектициди во самиот хотел.

Сомнежите се продлабочија и затоа што уште неколку гости од истиот хотел моментално се лекуваат. Германските медиуми пренесуваат изјава од локален лекар кој објаснил дека во хотелот била правена дезинфекција поради стеници. Властите реагираа за време на викендот, го евакуираа објектот и го ставија под печат во населбата Фатих, што го потврди и агенцијата Анадолија.

Во ист времe полицијата привлече внимание со серија приведувања. На почеток биле уапсени четворица продавачи на улична храна. Потоа во саботата следеле уште три приведувања, меѓу кои лице поврзано со хотелот и пекар од околната зона. Денеска биле приведени и двајца работници од самиот хотел. Нема потврда дали сите овие апсења имаат заедничка поврзаност. Турските институции засега не дадоа објаснување.

Семејството, кое доаѓало во Турција на одмор секоја година, пристигнало во Истанбул пред околу една недела. Во средата било примено во болница поради гадење и повраќање. Лекарите ги пуштиле истиот ден. Ноќта донела влошување и сите повторно биле пренесени во болница.

Децата починале први. Мајката ја загубила битката во петокот. Таткото останува на интензивна нега, а неговата состојба засега не е прецизирана.