Спротивставени информации од Вашингтон и Техеран
Американскиот претседател Доналд Трамп објави дека, по негова интервенција, во Иран била запрена егзекуцијата на осум жени кои протестирале против власта. Според неговите тврдења, четири од нив ќе бидат веднаш ослободени, додека останатите ќе добијат кратки затворски казни.
„Многу добри вести“, напиша Трамп на својата социјална мрежа Truth Social, додавајќи благодарност до иранското раководство за прифаќањето на неговото барање.
Сепак, ваквите наводи беа оспорени од иранска страна. Новинската агенција „Мизан“, поврзана со судската власт, соопшти дека информациите за заканувачки егзекуции се неточни.
Според официјален Техеран, дел од жените веќе биле ослободени, додека за останатите се водат судски постапки кои можат да завршат со затворски, но не и со смртни казни. Во соопштението се наведува и дека „Трамп повторно беше заблуден од лажни информации“.