Трамп потврди дека бил вознемирен од однесувањето на израелскиот премиер
Американскиот претседател Доналд Трамп потврди дека во телефонски разговор со израелскиот премиер Бенјамин Нетанјаху употребил остри зборови и го нарекол „луд“, коментирајќи ги тензиите поврзани со конфликтите во регионот.
Во интервју емитувано денеска, Трамп беше прашан за информациите објавени од порталот „Аксиос“, според кои во разговор со Нетанјаху употребил навредливи квалификации кон израелскиот лидер.
„Да. Не би рекол дека бев лут. Бев малку вознемирен од неговите постојани конфликти со Либан, знаете“, изјави Трамп.
Тој нагласи дека и покрај тоа, односите меѓу двајцата остануваат добри и дека вообичаено добро соработуваат.
Според медиумски извештаи разговорот бил исполнет со остри пораки
Повикувајќи се на свои извори, „Аксиос“ објави дека Трамп во телефонски разговор му упатил низа критики на Нетанјаху и изразил незадоволство од политиката на Израел.
„Ќе беше во затвор да не бев јас. Ти го чувам грбот. Сите сега те мразат. Сите го мразат Израел поради ова“, наводно му рекол Трамп на израелскиот премиер.
Во меѓувреме, Иран порача дека нема да прифати договор со САД за прекин на воените дејствија доколку во договорот не биде вклучен и Либан. И покрај претходниот договор постигнат со посредство на САД, тензиите меѓу Израел и Хезболах продолжија.
Продолжуваат тензиите во регионот
Либански безбедносни извори соопштија дека израелски дронови денеска извеле напади во јужен Либан, при што загинале најмалку шест лица. Бил погоден и автомобил јужно од Бејрут.
Од друга страна, Израел соопшти дека пресретнал „непријателски авион“, за кој се претпоставува дека бил лансиран од Хезболах.
Трамп остро реагирал и на прашањата дали Нетанјаху го довел во заблуда во врска со нападите врз Иран, нарекувајќи ги таквите тврдења дело на „непријатели“.
Американскиот претседател и претходно јавно упатуваше критики кон актерите во конфликтот, меѓу другото изјавувајќи дека Израел и Иран „немаат поим што прават“.