Доналд Трамп се огласи по средбата со Путин, рече дека разговорите во Алјаска биле конструктивни и со напредок, а Украина била клучна тема
Американскиот претседател Доналд Трамп по средбата со Путин изјави дека имале продуктивен состанок.
„Верувам дека имавме многу продуктивен состанок. Имаше многу, многу точки за кои се согласивме. Нема договор додека нема договор. Би рекол неколку големи точки, но сè уште не сме баш таму, постигнавме напредок. Секако ќе го повикам претседателот Зеленски и ќе му кажам за денешниот состанок. Навистина постигнавме голем напредок“, рече Трамп.
Тој најави дека разговорите ќе продолжат наскоро. „Ќе разговараме со вас многу наскоро и веројатно ќе се видиме повторно многу наскоро“, му порача на рускиот претседател.
На ова, Владимир Путин одговори со зборовите: „Следниот пат во Москва“. Трамп возврати: „Тоа е интересно. Ќе добијам малку критика за тоа, но би можел да видам дека е можно да се случи“.
Рускиот претседател ја отвори прес-конференцијата по состанокот со американскиот колега и изјави дека разговорите се одржале „во конструктивна атмосфера на меѓусебно почитување“.
„Имавме многу темелни преговори што беа доста корисни“, истакна Путин. Тој му се заблагодари на Доналд Трамп за предлагањето на самитот во Алјаска.
Путин објасни дека Алјаска била логична локација за разговорите поради заедничката историја меѓу Русија и САД во овој регион.
Рускиот претседател изјави дека односите меѓу двете држави паднале на најниска точка по Студената војна.
Преминувајќи на темата на разговорите, Путин рече дека Украина била централна точка. Тој го повтори својот став дека конфликтот произлегува од „фундаментални закани за нашата безбедност“.
„Русија е искрено заинтересирана за крај на конфликтот, но за да биде траен, мора да се елиминираат примарните причини“, нагласи Путин.
Тој додаде дека се согласува со ставот на Трамп за неопходноста од обезбедување на украинската безбедност. „Секако, ние сме подготвени да работиме на тоа“, рече рускиот претседател.
„Би сакал да се надевам дека договорот што го постигнавме заедно ќе ни помогне да ја приближиме таа цел и ќе го отвори патот кон мир во Украина“, додаде Путин.
Во своето обраќање тој ги критикуваше европските лидери, изразувајќи надеж дека нема да го „торпедираат почетниот напредок“.