САД се „најголемата надеж и светлина во светот“

Претседателот на САД Доналд Трамп изјави дека земјата е „дом на слободата“ и „крунисување на човечката историја“, говорејќи синоќа во Вашингтон на прославата по повод 250 години од американската независност.

Настанот го одбележа јубилејот од потпишувањето на Декларацијата за независност во Филаделфија, со која Тринаесетте колонии ги прекинаа врските со британската круна.

„Сега сме подобри од кога било“, рече Трамп во говорот што беше одложен неколку часа поради лоши временски услови.

Тој додаде дека „САД 250 години беа надежта, ветувањето, светлината и славата меѓу сите народи во светот“.

„Никој не може да биде како нас. И со Божја помош, секогаш ќе бидеме вакви или дури и подобри“, порача американскиот претседател.

Бури, топлотен бран и евакуации го одложија настанот

Прославата беше нарушена од екстремни временски услови, вклучувајќи силен топлотен бран и грмотевици на источниот брег на САД.

Во Вашингтон температурите надминаа 37 степени Целзиусови, а службите за итни случаи интервенираа кај 51 лице поради здравствени проблеми поврзани со жештината, при што 12 беа префрлени во болница.

Неколку часа пред говорот на Трамп беше издадена наредба за евакуација на Националниот мол, поради закана од силна бура.

Посетителите беа насочени да се засолнат во музеи и федерални згради, кои беа привремено отворени за таа цел.

Безбедносни мерки и политички пораки во завршниот говор

По повеќечасовни одложувања, Трамп се обрати пред илјадници присутни во услови на засилен безбедносен режим и присуство на Националната гарда.

Тој најави „златно доба на Америка“ и повторно изнесе тврдења за изборни неправилности, како и критики кон политичките противници, предупредувајќи на „закана од комунизмот“.

Во говорот најави и поддршка за Законот SAVE America, кој би вовел построги правила за гласање, вклучително и задолжителен доказ за државјанство и лична идентификација.

Настанот кулминираше со голем огномет со стотици илјади испукани ракети, со што беше заокружена прославата на јубилејот од американската независност.