ЦУК: три пожари сè уште горат кај Велес, Василево и Македонски Брод, додека пожарот кај Дојран е под контрола
Во текот на изминатото деноноќие, низ територијата на Македонија се евидентирани вкупно 21 пожар, информира Центарот за управување со кризи. Според нивните податоци, три пожари сè уште горат, еден е под контрола, а 17 се целосно изгаснати.
Активните пожари се локализирани во три различни региони на земјата. Првиот пожар е во близина на велешките села Џидимирци, Крушје и Иванковци. Вториот активен пожар е на подрачјето помеѓу селата Црешнево, Локвица и Крапа во Општина Македонски Брод, каде што се гори деградирана дабова шума и ниска вегетација. Третата активна огнена линија е во Општина Василево, кај село Нивичино.
Од Центарот за управување со кризи соопштуваат дека пожарот кај село Николич во Општина Дојран е ставен под контрола, откако беа преземени соодветни теренски мерки и интервенции.
Сите останати 17 пожари што биле активни во текот на вчерашниот ден се изгаснати, соопштува ЦУК. Состојбата се следи постојано, а на терен се ангажирани сите расположливи ресурси во соработка со локалните самоуправи и надлежните служби.