Пронајдени убиени припадници на паравоена организација
Тројцата мажи што вчера беа пронајдени мртви во поранешниот планинарски дом „Петрохан“ на Стара Планина во Бугарија, биле припадници на паравоена ренџерска агенција, јавија бугарските медиуми. Објектот „Петрохан“ се наоѓа север-северозападно од главниот град на земјата, во областа на Стара Планина.
Идентитет на жртвите и поврзаност со здружение
Како што објави bTV, жртвите се Дечо В. (45), Ивајло И. (49) и Пламен Ст. (51). Тие биле членови на „Национална агенција за контрола на заштитените подрачја“ (НАКЗТ), здружение регистрирано во 2022 година, чии цели вклучуваат основна и специјализирана обука за „планинска патрола“ и „ренџер“. Претседател на здружението бил Ивајло Валентинов Иванов, покажуваат податоците од Трговскиот регистар.
Според информациите на bTV, главен закупец на поранешниот планинарски дом бил Ивајло И., една од жртвите, додека сопственик на објектот бил друг нивни познаник со исто име, кој со години живеел во странство. Неговата мајка добила порака пред три до четири дена дека нејзиниот син нема да биде меѓу живите, по што контактот бил прекинат. Истражителите првично разгледувале можност и тој да е меѓу жртвите, но тоа било исклучено.
Истрага, верзии и активност на агенцијата
Како член на Управниот одбор на здружението се наведува и Ивајло Калушев, кој заедно со Ивајло Иванов бил партнер во Бугарската асоцијација за екстремни спортови ДООЕЛ, заедно со Дечо Василев, Пламен Статев и Николај Златков. Во колибата во близина на Петрохан, според достапните информации, живееле околу десетина луѓе, а по двајца сè уште се трага.
Агенцијата соработувала со европски и странски институции и располагала со целосно опремена база за обука на високопланински ренџери во областа Петрохан, Западна Стара Планина. Во 2022 година започнала и пилот-проект за воздушен надзор со дронови, со кој секојдневно се следела површина од околу 700 квадратни километри. Здружението имало рамковен договор со Министерството за животна средина и води, потпишан на 8 февруари 2022 година од Ивајло Иванов и тогашниот министер Борислав Сандов, во кабинетот на Кирил Петков.
Според bTV, истрагата ќе опфати повеќе верзии – од убиство до ритуално самоубиство. Се прибираат податоци, се испрашуваат роднини и познаници, а се анализираат и снимки од сообраќајот и безбедносните камери. Тројцата мажи биле пронајдени со прострелни рани во главите, оружје било најдено покрај телата, а забележан бил и обид за палење на објектот.