Царинска управа ги засили контролите – запленети 30.000 евра, 55 штеки цигари и откриени скриени мигранти

Во серија засилени контроли минатата недела, Царинската управа на Македонија спречи повеќе обиди за криумчарење пари, цигари, мигранти, алкохол и ИТ-опрема, соопштија надлежните. Акциите се реализирани на неколку гранични премини, при што се запленети значајни количини нелегална стока, а поднесени се соодветни постапки.

ЦАРИНА СПРЕЧИ СЕРИЈА ОБИДИ ЗА ШВЕРЦ: Пробале да криумчарат лекови, чоколади, мотоцикл и религиозни предмети

Скриени цигари во цистерни – обид за избегнување 81.000 денари давачки

На граничниот премин Богородица, царинските службеници открија 49 штеки цигари и 300 грама тутун, скриени вешто во цевките на една цистерна. Возачот ги поврзал со сајла за полесно извлекување и обидел да избегне плаќање давачки во износ од 81.000 денари. Против него е поведена постапка, а производите се запленети. Во друг случај, во кабината на камион-цистерна биле пронајдени уште 6 штеки цигари.

Српски државјанин се обидел да изнесе 40.000 евра – запленети 30.000

Исто така на Богородица, при обид за нелегален износ на пари, бил запленет износ од 30.000 евра кај српски државјанин кој не поседувал пријава за валута при влез во државата. Согласно законските прописи, му се вратени 10.000 евра, а остатокот е задржан.

Четворица мигранти откриени во камион – спречен нелегален влез

Службата за мобилни скенери откри четворица мигранти од Египет, сокриени во делот за палети на камион со грчки регистарски таблички. Обидот за нелегален влез во државата бил спречен на Богородица, а случајот е предаден на полицијата за натамошна постапка.

 Шверц на 540 шишиња вино во автобус – откриен на Блаце

На граничниот премин Блаце, службеници заплениле 540 шишиња вино, сокриени во автобус пријавен за влез во државата. Обидот за шверц бил навремено спречен.

 ИТ-опрема и автомобилски делови откриени при гранични контроли

На Меџитлија, во возило управувано од албански државјанин биле откриени 143 резервни делови за возила и 24 литри моторно масло. Исто така, на Блаце, во македонски автомобил, биле откриени три таблети, две матични плочи и четири читачи на жетони за кафе-апарати.