Над 2.500 мртви во Иран: масовен погреб во Техеран, САД предупредуваат на „силна акција“
Иранските власти денеска најавија масовен погреб за 300 загинати во главниот град, додека организациите за човекови права тврдат дека вкупниот број жртви од протестите во Иран надминал 2.500. Во меѓувреме, САД јавно изразија поддршка за демонстрантите и предупредија на можни егзекуции.
Масовен погреб под засилено обезбедување
Иранската државна телевизија соопшти дека денеска во Техеран ќе се одржи масовен погреб со 300 тела на припадници на безбедносните сили и цивили. Погребната церемонија, според најавите, ќе се одржи на Универзитетот во Техеран, под строги безбедносни мерки, јавува Associated Press.
Податоци за жртвите и приведените
Американската организација Human Rights Activists News Agency наведува дека во протестите се убиени повеќе од 2.550 лица. Според нивните податоци, 2.403 од загинатите биле демонстранти, 147 лица биле поврзани со властите, а меѓу жртвите има и 12 деца, како и девет цивили за кои се тврди дека не учествувале во протестите. Истата организација соопшти дека над 18.100 лица биле приведени. Associated Press наведува дека, поради прекините на комуникациите во Иран, овие бројки не можат независно да се потврдат.
Реакции од САД и пораки од Техеран
Американскиот претседател Доналд Трамп ги повика иранските демонстранти да продолжат со протестите, порачувајќи дека „помошта е на пат“. Тој го предупреди Иран да не спроведува егзекуции врз приведените, најавувајќи дека САД ќе преземат „силна акција“ доколку дојде до таков развој. Од U.S. State Department изразија загриженост дека еден од демонстрантите би можел да биде погубен уште денес.
Иранскиот министер за надворешни работи Абас Аракчи изјави дека Иран не сака војна со САД, но дека земјата е „целосно подготвена“ за такво сценарио. Тој оцени дека протестите се „нормални“ во систем кој, според него, се темели на волјата на народот, но предупреди и на елементи кои предизвикуваат насилство и немири.