„Патриот“ ќе биде распореден во Малатија
Турција ја засилува својата воздушна одбрана откако две ракети беа испукани од Иран и се подготвува за распоредување на системот за противвоздушна одбрана „Патриот“. Министерството за одбрана во Анкара соопшти дека, како дел од мерките на НАТО, системот ќе биде поставен во источната турска покраина Малатија со цел дополнително зајакнување на воздушната безбедност.
Ракета пресретната над турска територија
Во понеделник Турција, како членка на НАТО, пресретна ракета испукана од Иран на своја територија, што претставува втор ваков инцидент во рок од една недела, соопшти официјална Анкара. Дел од остатоците од ракетата наводно паднале во јужниот регион Газиантеп, во близина на сириската граница.
Минатата недела одбранбен систем на НАТО во турската погранична област со Иран пресретна балистичка ракета, чии остатоци паднаа во покраината Хатај. Во двата случаи нема повредени, а засега не е познато која била целта на ракетите.
Телефонски разговор меѓу Ердоган и Пезешкијан
Во меѓувреме, турскиот претседател Реџеп Таип Ердоган разговараше по телефон со иранскиот претседател Масуд Пезешкијан. Ердоган изјавил дека Турција се обидува да отвори простор за дипломатија со цел што поскоро да се стави крај на војната.
Тој нагласил дека не ги одобрува „нелегалните интервенции против Иран и таргетирањето на братските земји во регионот од страна на Иран“, додавајќи дека ваквите дејствија не се во ничиј интерес и дека треба да престанат.
Од друга страна, иранскиот претседател Пезешкијан изјавил дека ракетите кои влегле во турскиот воздушен простор не се од иранско потекло и најавил сеопфатна истрага за инцидентот.
Во Турција, меѓу другите локации, американски војници се стационирани и во базата Инџирлик на НАТО на југоистокот од земјата.