Украинскиот претседател Володимир Зеленски изјави дека ќе нареди повлекување на трупите на неговата земја од источниот град Бахмут доколку постои ризик тие да бидат опколени од руските сили.
Говорејќи на прес-конференција во Полска, тој сепак рече дека додека се соочуваат со многу предизвикувачка ситуација во градот, тој не гледа потреба во моментот тие да се повлечат.
„За мене најважното прашање е нашата војска. И доколку дојде до момент на уште пожешки настани и опасност да изгубиме персонал поради опкружувањето, ќе има соодветни правилни одлуки на генералот на теренот“, рече Зеленски.
Бахмут беше целосно уништен за осум месеци борби во она што стана најдолгата и најкрвавата битка во едногодишниот напад на Русија врз Украина.
На почетокот на оваа недела, војниците им помагаа на некои од последните жители во градот да се евакуираат, транспортирајќи ги со оклопни возила до места низ земјата каде што можеа да најдат засолниште.
Не се знае точно колку цивили сè уште има во Бахмут, кој некогаш бил дом на околу 70.000 луѓе.
Додека Киев во понеделникот рече дека силите на Москва се „многу далеку“ од заземање на градот, украинската висока команда призна дека имало одреден руски напредок во градот.
Тинк-тенкот со седиште во Вашингтон, Институтот за проучување на војната (ISW) го потврди ова и рече дека силите на Москва најверојатно напредувале северно од Бахмут.