Владата ја поддржува исплатата на помошта
Од утре стартува судскиот процес за пожарот во кочанската дискотека „Пулс“, трагедија во која животите ги загубија 63 млади. Владата ја поддржа иницијативата на Здружението на родители за исплата на еднократна парична помош, а премиерот Христијан Мицкоски посочи дека институциите прават сè за да им се помогне на погодените семејства.
Пратениците без став за анкетна комисија
За предлогот да се формира анкетна комисија и да се одржи надзорна расправа, од пратеничката група на ВМРО-ДПМНЕ велат дека не разговарале за тоа и дека не сакаат случајот да се политизира. Пратеникот Ковачки изјави дека следен чекор е работа на обвинителите и судиите.
Организација на судењето и подготвеност на обвинителството
Судењето ќе се одржи во судницата „Идризово“, а најголемиот организациски товар ќе биде на Кривичниот суд. Минатата недела правосудните органи порачаа дека ќе обезбедат фер и правична постапка. Претседателката на судот, Димевска, апелираше медиумите да известуваат одговорно и без сензационализам. Јавниот обвинител Коцевски најави проширен обвинителски тим составен од 15 обвинители, нагласувајќи дека доказниот материјал е обемен и дека нема да се дозволи одлагање на рочиштата.