Финска започна несекојдневна туристичка кампања наменета за слободните луѓе од целиот свет, нудејќи им целосно платено четиридневно патување со организирано сместување, храна, активности и вечера на слепо. Националната промотивна организација „Visit Finland“ преку проектот бара 16 учесници кои во февруари 2027 година ќе имаат прилика одблиску да ја запознаат локалната култура, гастрономијата и да добијат шанса за љубов.
Иницијативата се води под насловот „Finnish Dinner Date“ и вклучува реализација на две посебни групни патувања. Осум избрани кандидати ќе отпатуваат во престолнината Хелсинки, додека останатите осуммина ќе заминат во Тампере, град сместен во живописната езерска област. Програмата ќе се одвива меѓу 9 и 19 февруари 2027 година, а учесниците ќе ја дознаат точната дестинација откако официјално ќе го потврдат своето присуство.
Централен момент на целиот престој ќе претставува специјално подготвена вечера на слепо. На неа секоја група од осум странски гости ќе се сретне со по двајца слободни локални жители на Финска. За гастрономскиот дел се креирани посебни дегустациски менија базирани на регионалната традиција, при што менито во Хелсинки го подготвува шеф Аделе Кинунен од „Кафе Савој“, додека во Тампере готви Хенри Тиканен, поранешен натпреварувач на светскиот кулинарски натпревар „Бокуз д’Ор“.
Оваа идеја произлезе од локалниот фински тренд наречен „синккукори“ или кошничка за самци. Во дел од супермаркетите во земјата, купувачите што бараат партнер земаат специјални розови кошнички, суптилно покажувајќи дека се подготвени за нови познанства, што претходно стана вирален хит на социјалните мрежи.
Сите заинтересирани кандидати треба да исполнат два услови за аплицирање. Првиот чекор бара снимање кратко видео на англиски јазик со одговор на прашањето што би послужиле на вечера за запознавање и од кои причини. Материјалот треба да се објави на платформите Инстаграм, Тикток или Јутјуб со ознаката #FinnishDinnerDate и тагирање на официјалниот профил на „Visit Finland“.
Вториот чекор опфаќа пополнување пријава преку официјалната интернет-страница на туристичката организација со приложен линк до видеото, при што профилите на социјалните мрежи мора да бидат јавни. Пријавувањето трае до 10 ноември 2026 година до 11:59 часот според финско време, а 16-те финалисти ќе бидат објавени на 1 декември на профилите на промоторот, во земјата која веќе девет години по ред ја носи титулата за најсреќна нација во светот.