Поранешниот министер за економија Крешник Бектеши, поранешниот директор на Државниот пазарен инспекторат Горан Трајковски и уште едно лице вечерва се спроведени на сослушување во ОЈО Кочани. Тие се спроведени во врска со трагедијата во дискотека во Кочани во која во пожар животот го загубија 59 лица, а над 150 се повредени.
За Бектеши како и за други лица, според информации од обвинителството, ќе се бара краткотраен притвор.
Од ОЈО Кочани откако беше сослушан претходно попладнево заминал кочанскиот градоначалник Љупчо Папазов. Тој ги избегнал медиумите. За него се уште не се знае дали е меѓу осомничените за трагедијата.
Крешник Бектеши од полициска станица Карпош, го носат на распит во Кочани
Државниот јавен обвинител Љупчо Коцевски денеска на прес-конференција соопшти дека во врска со несреќата во ноќниот клуб „Пулс“ во Кочани се работи на итно процесуирање на 14 осомничени.
Тој информираше дека се сомничат за „тешки дела против општа сигурност“ по член 292 од Кривичниот законик. Казна затвор е од најмалку три години без горна граница на казнување, што може да се движи до 20 години. Воедно, рече дека се испитуваат дејствија на примање и давање поткуп како и незаконска набавка на пиротехнички средства.
Извор: Миа