Еди Рама најави дека рушењето на дивоградбите на албанското крајбрежје е процес што нема да запре додека не се искорени целосно. Со објава на социјалните мрежи, тој информираше дека акцијата започнала во областа Р’тот Родон (Kepi e Rodonit) во општина Драч, проследена со фотографии од првите уривања.
„Уривањето на дивоградбите, кое е започнато насекаде, не е акција, туку процес кој не само што нема да запре додека не се елиминира оваа појава, туку во наредните денови ќе биде придружен со нов пакет мерки за намалување на оваа појава, зголемувајќи ја ударната сила на законот врз виновниците и одговорните лица на различни нивоа, вклучувајќи ги и „инфилтрираните“ во инспекторатите, полицијата и така натаму“, порача Рама.
Тој потенцира дека иницијативата не е привремена акција, туку дел од борбата против узурпацијата на земјиштето. Според него, ќе следат и законски измени со цел поголема одговорност кај инспекторите и институциите што дозволиле кршење на правилата.
Во својата објава, Рама оцени дека „тоа е уште едно природно чудо злоупотребено за профит преку нелегална градба“. Тој нагласи дека заштитата на територијата ќе продолжи подеднакво и на северот, и на југот, како и во централниот дел на Албанија.
Во меѓувреме, Судот во Драч одреди „затворски притвор“ за Ардијан Халили, поранешен началник на Инспекторатот за територијална заштита во истиот округ. Тој е сопственик на еден од урнатите објекти, нелегално изграден на површина од 5.600 квадратни метри.
Објектот опфаќал двокатна градба, мини-фудбалско игралиште, базен и 11 мали куќарки за туристи. Полицијата соопшти дека градбата започнала во 2018 година.
Халили беше уапсен пред четири дена под сомнение за „бесправна градба“ и „злоупотреба на службена должност“. На рочиштето неговата сопруга, поранешната обвинителка Рабијана Халили, го бранеше случајот. Обвинетиот ги отфрли тврдењата за злоупотреба на функцијата, изјавувајќи дека сите активности биле со знаење на локалните власти, иако без градежна дозвола.