Посетата на претседателката на Европската комисија Урсула фон дер Лајен во Сопот беше проследена со протест организиран од приврзаниците на партијата Преродба. Демонстрантите се собраа на плоштадот пред „Вазовските машиностроителни заводи“ (ВМЗ), каде што денеска беше најавено присуство и на бугарскиот премиер Росен Желјазков.
Демонстрантите издигнаа транспаренти со пораки: „Не на еврото“, „Не на војната“, „Не сме колонија на Брисел“, како и „Денес бараат бомби, утре тенкови, задутре – вашите синови“. Тие изјавија дека не сакаат Бугарија да биде вовлечена во војната меѓу Русија и Украина и предупредија на опасност од милитаризација на државата.
„Сакаме да ѝ покажеме на претседателката на ЕК дека не е добредојдена, бидејќи таа ги руши економиите и вредностите на земјите членки на Европската унија“, изјави пратеникот Ангел Георгиев. Според него, бугарските власти ја претвораат земјата во „експериментално поле за евроатлантските сили кои се подготвени преку сите средства да водат индиректна војна со Русија“.
Дел од присутните порачаа: „Не сакаме да учествуваме со производство на оружје во војната меѓу Русија и Украина“.
Во исто време, лидерот на Преродба, Костадин Костадинов, во гостување на БНТ рече дека Урсула фон дер Лајен „не е поканета и не е посакувана“ во Бугарија. Тој праша зошто јавноста дознала за посетата дури во четврток навечер. „Овде не станува збор за неуважување од нејзина страна, туку за страв на власта од бугарскиот народ и од демонстрантите пред ВМЗ – Сопот“, нагласи Костадинов.
„Од кого е загрозена безбедноста на ЕУ? Ако фон дер Лајен мисли дека Русија е непријател на Бугарија, огромниот дел од народот не мисли така. Ако сака да го подготвува ЕУ за војна со Русија, треба отворено да го каже тоа“, додаде тој.
Во околината на ВМЗ – Сопот имаше засилено полициско присуство. „Европската унија се милитаризира и тоа е жално“, заклучи Костадинов
