МВР го расчисти брутално убиство во гостиварско
Министерството за внатрешни работи го расчисти случајот со бруталното убиство на жена од селото Здуње, која била киднапирана, убиена и запалена во атарот на селото Чегране. Случајот бил пријавен на 11 декември, кога Ј. М. од Здуње пријавил дека неговиот чичко му покажал видео-снимки на кои се гледа како НН лице ја грабнува неговата мајка Х. А. со автомобил „Фиат“. По настанот, жената станала недостапна на својот мобилен телефон.
Признание за убиството за време на полициските разговори
По пријавата, МВР веднаш презело активности и повикало повеќе лица на разговор. За време на информативните разговори, сопругата на еден од осомничените признала дека таа и нејзиниот сопруг С. А. ја убиле жената. Според признанието, по извршувањето на убиството, телото било запалено во атарот на селото Чегране. Случајот е целосно документиран, а истрагата продолжува.
Обвинителството презема истражни дејствија, одреден притвор
Јавен обвинител од Основното јавно обвинителство Гостивар во текот на ноќта извршил увид на местото каде што било пронајдено телото на засега неидентификувано лице, закопано во земја. Според Обвинителството, станува збор за жена која претходно била пријавена за исчезната, со индиции дека била грабната. Наредена е обдукција и идентификација на телото, како и собирање траги и докази од местото на настанот. За едно осомничено лице е определен притвор од 48 часа за обезбедување докази, додека уште едно лице е задржано за проверка на евентуална инволвираност. Обвинителството најави продолжување на активностите за целосно расветлување на околностите и мотивите за злосторството.