„Мирај нинген сентакуки“ ја комбинира технологијата, релаксацијата и хигиената – доволни се само неколку минути за целосно капење без ниту еден ваш потег
Јапонската компанија „Сајенс корпорејшн“ на саемот „Осака-Кансај Експо 2025“ го претстави својот најнов изум, машина што ги мие луѓето, наречена „Мирај нинген сентакуки“ („Машина за миење на човекот на иднината“).
Станува збор за самоуправувачка машина за капење, во форма на капсула со ниско седиште. Кога човекот ќе седне во неа, капацитетот се затвора автоматски, а процесот започнува. Капсулата постепено се полни со топла вода и специјален сапун до нивото на градите, по што системот ја исцедува водата и прска чиста за да ја измие пената и нечистотијата.
Во внатрешноста на уредот, на екранот се прикажуваат опуштачки сцени, од подводниот свет, зајдисонца или природни пејзажи, придружени со смирувачка музика. Целта на концептот, велат од компанијата, е да се создаде искуство што истовремено го чисти телото и го опушта умот.
Процесот трае само неколку минути и не бара никаков напор од човекот. Производителите додаваат дека машината значително ја намалува потрошувачката на вода, благодарение на интелигентниот систем за филтрирање и рециклирање.
Капсулата функционира со помош на вештачка интелигенција и е опремена со прецизни сензори кои ја мерат температурата, нивото и протокот на водата за максимална безбедност и удобност.
Тие што веќе ја тестирале оваа „капа за капење од иднината“, изјавиле дека чувството е неверојатно, а искуството, целосно ново и освежувачко.