Редовните локални избори во десет општини во Србија започнаа утрово во 7:00 часот, а гласачките места ќе бидат отворени до 20:00 часот. Изборниот ден го одбележаа бројни инциденти, физички пресметки и повредени лица на повеќе локации, според извештаи од терен и медиуми.
Според податоците за излезност, до раните попладневни часови гласале 41% од избирачите во Севојно, 40% во Лучани, 36,2% во Бор, 44% во Кула и 34,4% во Аранѓеловац, додека во Кладово до 12 часот излезноста изнесувала 32,1%. Во Лучани до 14:00 часот гласале 47,53% од регистрираните гласачи, според Општинската изборна комисија.
Иако во првите часови од гласањето немало поголеми неправилности, подоцна се пријавени низа спорни ситуации. Во дел од избирачките места имало проблеми со тајноста на гласањето, при што контролори барале поинакво поставување на параваните за да се спречи фотографирање на гласачките ливчиња. Во Гуча, според присутни, дел од гласачите јавно покажувале за кого гласаат, што отвори сомнежи за евентуално купување гласови.
Во Лучани е пријавен инцидент на гласачко место број 13, каде член на избирачки одбор изнел пликови од гласачкото место, што предизвикало реакција кај граѓаните кои побарале тие да бидат отворени. На местото интервенирала полиција.
Граѓани пријавиле и организиран превоз на гласачи со автобуси, придружувани од други возила, што дополнително ја засилило напнатоста околу изборниот процес. Дополнително, околу 600 граѓани гласаат од дома, што исто така се наведува како фактор што може да влијае врз текот на изборите.
Најсериозни инциденти се регистрирани во Бор и Бајина Башта. Во Бор, во утринските часови, пред гласачко место бил нападнат студент, а подоцна се пријавени и напади врз членови на мобилни избирачки тимови. Според изјави на сведоци и групи на студенти, дел од повредените се здобиле со повреди на главата и им била укажана медицинска помош.
Студентски групи тврдат дека членовите на мобилен тим биле нападнати и со бибер-спреј, при што добиле повреди кои барале лекарска интервенција. Според нивните наводи, инцидентите се случувале во присуство на полицијата.
Во Бајина Башта биле нападнати активист и набљудувач на избори на паркинг во близина на гласачко место, при што им биле одземени мобилните телефони. Пријавен е и напад врз новинар, кој според достапните информации бил удрен од повеќе лица.
Во текот на еден од инцидентите бил забележан и човек со огнено оружје кој се движел кон група граѓани, што дополнително ја зголемило вознемиреноста.
Во Кула, пак, група маскирани лица се појавила во близина на стадион, по што следувале тензии и вербални судири меѓу граѓани и полицијата, а пријавени се и физички турканици.
Иако дел од институциите наведуваат дека изборите се одвиваат без поголеми проблеми, бројните пријави за инциденти, насилство и нерегуларности укажуваат на тензична атмосфера на повеќе избирачки места низ земјата.
View this post on Instagram