На 27 август 2025 година, во католичкото училиште и црква „Благовештение“ во населбата Виндом, Минеаполис, се случи масовно пукање кое ја потресе целата јавност во САД. За време на закажана училишна миса, на која присуствувале учениците и наставниците, вооружен напаѓач влегол и отворил оган со пушка и пиштол.

Во нападот загинаа три лица – двајца ученици и самиот сторител, кој извршил самоубиство. Повредени беа најмалку 18 лица, од кои 15 деца и тројца повозрасни граѓани.

Напаѓачот е идентификуван како 23-годишниот Робин Вестман, транссексуалец, роден како машко, а се идентификувал како жена. Претходно не бил познат на органите за спроведување на законот.

Федералните истражители открија стотици страници ракопис кои му припаѓаат на Вестман и во кои, како што рече вршителот на должноста федерален обвинител Џозеф Томпсон, имало „чиста, недискриминирачка омраза“ кон сите можни групи.

„Напаѓачот изразувал омраза кон Афроамериканци, кон Мексиканци, кон христијани и кон Евреи. Накратко, неговото срце било полно со омраза кон сите“, изјави Томпсон.

Тој додаде дека според содржината на пишувањата, Вестман бил „опседнат со идејата да убива деца, беспомошни деца“, а нападот го гледал како начин да ја нападне најранливата група – малолетниците додека се на училиште или во црква.

Неколку часа пред масакрот, на YouTube беше објавено 20-минутно видео во кое се гледа како лице, најверојатно Вестман, врти страници со неразбирливи записи, додека кашла и манично се смее. Во видеата имало и снимки со оружје – полуавтоматска пушка, пушка и кутија со муниција на која пишувало „за децата“ и „убијте го Доналд Трамп“.

Доказите од записите на убиецот и неговата активност на YouTube, сугерираат дека Вестман можеби бил поврзан со „764“, мала но озлогласена мизантропска група. Се известува дека оваа група црпи идеолошко влијание од „Order od nine angles“ (O9A), езотерична сатанистичка и нео-нацистичка мрежа што потекнува од Британија во 1970-тите. O9A промовира екстремно насилство, трансгресивни окултни ритуали и нихилистички светогледи. Нејзините децентрализирани ограноци, како „764“, често го глорифицираат тероризмот, масовните убиства и општествениот колапс.

„Ова е трагедија од незамисливи размери“, изјави началникот на полицијата во Минеаполис, Брајан О’Хара, додавајќи дека службите ќе продолжат да ги анализираат доказите за да утврдат како Вестман дошол до оружјето и зошто никој не реагирал на сигналите.

Нападот во Минеаполис повторно го отвори прашањето за вооруженото насилство во САД и за потребата од посериозна превенција, како и подобар надзор врз лицата кои покажуваат знаци на радикализација и ментални нарушувања.