Поранешниот американски претседател Барак Обама повторно ја разгоре дебатата за една од најголемите мистерии во светот

 

Поранешниот американски претседател Барак Обама повторно ја разгоре дебатата за една од најголемите мистерии во светот. Појавувајќи се во подкастот на Брајан Тајлер Коен, Обама се пошегува кога беше прашан дали вонземјаните постојат, одговарајќи да, но истакнувајќи дека никогаш не ги видел. Тој, исто така, ги негираше популарните теории на заговор дека вонземјаните се чуваат во таен подземен објект во озлогласената Област 51, објави Фокс њуз.

Нема подземен објект

„Тие се вистински, но јас не сум ги видел“, рече Обама.

Тој додаде дека нема тајни објекти во воздухопловната база во Невада, позната како Област 51. „Нема подземен комплекс, освен ако нема некаков огромен заговор што го криеле од претседателот на Соединетите Американски Држави“, продолжи тој со хумористичен тон.

На прашањето од водителот на подкастот, што беше неговото прво прашање по преземањето на функцијата, Обама се насмеа и одговори: „Каде се вонземјаните?“

Снимки од необјаснети објекти

Ова не е прв пат Обама да зборува за можноста за вонземски живот. За време на гостувањето во 2021 година во „The Late Late Show with James Corden“, тој откри дека по преземањето на функцијата побарал информации за вонземјаните и наводните тајни лаборатории каде што се изучуваат. Тој рече дека добил негативен одговор.
Сепак, Обама во тоа време потврди дека властите сериозно го истражуваат леталото чии движења не можат да се објаснат.

„Постојат снимки и записи за објекти на небото за кои не знаеме точно што се“, рече тој. „Не можеме да објасниме како се движеле, нивната траекторија. Тие не ги покажаа вообичаените шеми на движење. Затоа луѓето сè уште сериозно се обидуваат да истражат и да откријат што е тоа“, опиша тој.