Двајца државјани на Косово се лишени од слобода во Скопје поради сомнение за фалсификување пари. Кај нив биле пронајдени пари во различни валути и апоени, чија вкупна вредност е проценета на околу 230.000 евра.
Од МВР информираат дека на 3 август 2026 година, полициски службеници од Единицата за интервентна полиција при СВР Скопје ги лишиле од слобода Ф.Р. (30) и Т.Т. (44), двајцата државјани на Република Косово.
Двајцата се сомничат за сторено кривично дело „фалсификување пари“ по член 268 од Кривичниот законик.
Според информациите од МВР, лицата биле запрени при извршен преглед на возило „голф“ во кое се наоѓале. При прегледот биле пронајдени пари во различни валути и апоени – евра, американски долари, швајцарски франци и британски фунти.
Вкупната вредност на пронајдените пари изнесувала околу 230.000 евра. Парите биле одземени, а двајцата приведени биле спроведени во Полициската станица Центар за понатамошна постапка.
Од Министерството за внатрешни работи додаваат дека по целосното документирање на случајот, а во координација со јавен обвинител, ќе биде поднесен соодветен поднесок.