Земјотрес со јачина од 6,4 степени по Рихтер околу 18 часот ја погоди провинцијата Хатај во јужна Турција. Ова е регионот кој пред две седмици беше погоден од разорниот земјотрес кој однесе повеќе од 41.000 животи. Земјотресот бил на длабочина од 10 километри.

Земјотресот бил почувствуван и во Сирија, Либан, Кипар и во Израел.

Турската агенција за управување со катастрофи и вонредни ситуации (АФАД) соопшти дека во 20:04 часот по локално време се случил земјотрес со јачина од 6,4 степени според Рихтеровата скала, чиј епицентар бил во областа Дефне во Хатај. Додаваат дека во 20 часот и 7 минути се случил уште еден последовен потрес со јачина од 5,8 степени, чиј епицентар бил областа Самандаг во Хатај.