Ретко раѓање на азиски слон во САД
Националната зоолошка градина Смитсонијан во Вашингтон доби женско младенче азиски слон, прво вакво раѓање по речиси четврт век.
Младенчето тешко околу 140 килограми се родило во понеделникот наутро, а негови родители се 12-годишната Ни Лин и 44-годишниот Спајк, пренесуваат медиумите. Бременоста на Ни Лин траела 21 месец, што е вообичаен период за овој вид, чија гестација се движи од 18 до 22 месеци.
„Воодушевени сме што го пречекуваме бебето азиски слон по 25 години“, рече Бренди Смит, директорка на Националниот зоолошка градина и Институт за конзервациска биологија на Смитсонијан.
Од зоолошката градина посочуваат дека раѓањето има големо значење за зачувувањето на видот. И двајцата родители поседуваат ретки генетски линии, што може да придонесе за подобрување на генетската разновидност кај азиските слонови во контролирани услови. Спајк претходно имал три младенчиња, но ова е првото потомство на Ни Лин, како и првото преживеано младенче на машкиот слон.
Период на адаптација и подготовка за претставување
Новороденчето ќе помине околу еден месец во изолација за да се зајакне врската со мајката. По овој период се очекува постепено да биде претставено пред посетителите.
Од установата објавија дека јавноста ќе има можност да учествува во изборот на името на младенчето преку донации од пет долари по глас. Името што ќе добие најголема финансиска поддршка ќе стане официјално име на слончето. Во понудата се имињата Лин Маи, Тао Ни, Ту Ан и Тујет, кои имаат виетнамско потекло и се поврзуваат со наследството на мајката Ни Лин.