Инцидентот се случи при обид за слетување, екипажот преживеа

Рано утринава на најголемиот каргоаеродром во светот во Хонг Конг, товарен авион од Дубаи се урна додека се обидувал да слета. Авионот излетал од пистата и паднал во морето.

Сите членови на екипажот биле спасени и немаат повреди, потврдија од авиокомпанијата. Сепак, локалните медиуми јавуваат дека две лица загинале – двајца вработени во безбедносниот тим на аеродромот, на возраст од 30 и 41 година, чиј патролен автомобил бил удрен од авионот и завршил во морето.

„Членовите на екипажот беа спасени, а авионот немаше товар во себе“, се наведува во соопштението на авиокомпанијата од Емиратите.

Надлежните служби веднаш интервенирале, а истрагата за причините за несреќата е во тек.