Пелистер убедливо поразен од Барселона во последното коло од Лигата на шампионите
Ракометарите на Еурофарм Пелистер доживеаја убедлив пораз од Барселона со 47:27 во последното коло од групната фаза во Лигата на шампионите. Натпреварот одигран во „Палау Блауграна“ беше последен предизвик за битолскиот тим во тешката групна фаза, но избраниците на Стевче Алушовски не успеаја да приредат изненадување.
Со овој пораз Пелистер ја завршува сезоната на седмото место во групата Б со вкупно шест освоени бодови, односно две победи и две нерешени средби, пред екипата на Загреб.
Барселона го контролираше ритамот во првото полувреме
Неколку илјади љубители на ракометот беа присутни во „Палау Блауграна“ за последниот натпревар од групната фаза. Тренерот Ортега настапи со најсилниот состав на Барселона, но со чести ротации, додека Алушовски не можеше да смета на Домен Тајник и Павле Атанасијевиќ.
Двете екипи го отворија мечот со брзо темпо и ефектни голови. За Пелистер погодија Граховац и Манасков, а кај домаќините возвратија Баруфет и Цикуша. Околу десеттата минута каталонскиот тим почна да создава предност преку головите на Сола и Баруфет.
Во 17. минута Алушовски побара минута одмор при негатива од четири гола, но грешките на битолскиот состав продолжија. Кузмановски го постигна својот прв погодок, а крилните играчи беа сигурни во реализацијата, но Јанц, Макуц и нововлезениот Дика Мем ја зголемија предноста на Барселона на шест гола во 23. минута. До крајот на полувремето домаќините ја задржаа иницијативата и на одмор заминаа со убедливи 24:15.
Каталонците ја зголемуваа предноста во вториот дел
Барселона го отвори второто полувреме со три брзи гола и првпат стигна до двоцифрена предност. Во продолжението каталонскиот состав ја одржуваше разликата од 12 до 13 голови, а потоа со серија погодоци стигна до 33:19.
Во брзото темпо на играта Пелистер постепено го загуби ритамот, додека водството на домаќините постојано растеше. До самиот крај Барселона ја зголемуваше разликата и натпреварот го заврши со највисоката предност на мечот – 20 голови.
Сола најефикасен, головите кај Пелистер рамномерно распределени
Најефикасен играч на натпреварот беше Адриан Сола со седум постигнати голови.
Во составот на Еурофарм Пелистер реализацијата беше рамномерно распределена, а тренерот Алушовски им даде минутажа на сите ракометари. Со по три гола натпреварот го завршија Манасков, Видомски, Ристевски, Граховац, Хенигман, Кузмановски и Петар Атанасијевиќ.