Поради температури над 40°C, Министерството за здравство препорачува олеснувања за работодавачи и заштита за ранливи граѓани
Министерството за здравство информира дека мерките поради топлотниот бран се на сила до 26 јули 2025 година. Според прогнозата од УХМР, температурите над 40°C ќе продолжат и во наредните денови, што го наложи воведувањето мерки.
На предлог на Министерството за здравство, Владата донесе дополнителни препораки за работодавачите од 23 до 26 јули. Препораките вклучуваат ослободување од работа за бремени жени и лица над 60 години, каде што е тоа возможно.
Се предлага и работа од далечина, флексибилно или двократно работно време, во зависност од условите.
Мерките не се однесуваат на вработените во критичната инфраструктура: здравство, полиција, армија, енергетика и транспорт.
Остануваат на сила и мерките од постоечкиот акциски план за заштита при екстремни температури.
Работата на отворено треба да се одложи од 11:00 до 17:00 часот, кога топлотниот стрес е најголем.
Работодавците имаат обврска да обезбедат разладени простории со температура до 25°C, каде што е можно.
Сите здравствени установи и институции со ризични категории мора да применат вонредни протоколи.
Министерството апелира граѓаните да се придржуваат до препораките за самозаштита во услови на топлотен бран.
Да се престојува во разладени простории, особено од 11 до 17 часот, и да се пие доволно вода.
Да се избегнува алкохол, тешка облека и физичка активност во најжешкиот дел од денот.
Особено внимание да се посвети на деца, стари лица, хронично болни и бремени жени – најранливите категории.
При симптоми како вртоглавица, гадење или забрзан пулс, веднаш да се побара медицинска помош. Се препорачува одложување на активности на отворено, во критичниот дел од денот – особено кај децата.
Министерството за здравство најави дека ќе продолжи со секојдневно следење на состојбата и координација со институциите.