ВЛЕН и ДУИ со преписки
ВЛЕН и ДУИ, двете водечки партии од албанскиот блок, влегоа во жестоки обвинувања околу наводното влијание на српски капитал во Македонија. Според ВЛЕН, ДУИ одамна се откажала од заштита на интересите на Албанците, дозволувајќи српски и црногорски компании да навлезат во клучни сектори, меѓу кои телекомуникациите и казината.
Обвинувања за „српски свет“
„ДУИ го донесе ‘српскиот свет’ во срцето на земјата, преку МТЕЛ и српските подземни структури, работејќи за Белград и против Косово“, стои во реакцијата на ВЛЕН. Тие најавуваат дека ќе продолжат да ги штитат евроатлантските вредности и националните интереси на Албанците.
Одговорот на ДУИ
ДУИ возврати со потсетување дека ВЛЕН во својата програма за 2024 година ветила основање на Албанска банка со доминантен албански капитал, што, според нив, би гарантирало економско зајакнување на Албанците. Од партијата додаваат дека банкарскиот сектор и стратешките институции не смеат да паднат под влијание на Белград.
Полемиката меѓу двете партии продолжува со меѓусебни обвинувања за предавство на албанските интереси, а темата се очекува да доминира во предизборната кампања.