Опозициската партија ВМРО-ДПМНЕ реагираше по новите лажни дојави за бомби низ Скопје, при што посочи дека безбедносната состојба во Македонија е нарушена.
Алармантно е што секој ден имаме лажни дојави за бомби во јавни објекти, а МВР со месеци не може да најде кој ги испраќа. Секој ден се нарушува училишниот час на илјадници ученици во скопските средни училишта, се вознемируваат учениците, наставниот персонал и родителите. Денес заради лажни дојави за бомби се предизвика паника и во шопинг молови, но јавни објекти како Железничката станица. Илјадници граѓани се во страв и под притисок секој ден, велат од ВМРО-ДПМНЕ.
Од партијата посочуваат дека Македонија не смее како НАТО членка да бидеме во постојан грч и страв од терористички активности.
Одговорност за несправување со ситуацијата е во врвот на МВР. Оливер Спасовски ја има надлежноста како министер за внатрешни работи да го обезбеди јавниот ред и мир и да гарантира безбедност во рамки на државата. Спасовски не е способен да ја смири ситуацијата. Што прави Спасовски два месеци и што е преземено? Зошто уште немаме ниту еден санкциониран и кој е планот за во иднина? Власта мора итно да преземе мерки за враќање на безбедноста на ниво. А, Оливер Спасовски да си поднесе оставка веднаш. Безбедноста на граѓаните нема цена, а Оливер Спасовски ако не може да ја обезбеди доблесно е да си поднесе оставка, побараа од партијата.