ВМРО-ДПМНЕ до Таравари: Кој е тој меѓународен фактор што бара Алијанса да влезе во Владата?

Доколку Таравари премолчи и не каже, значи дека не е искрен и има друга причина зошто сака да влезе во Владата, сметаат од опозициската партија.

Опозициската ВМРО-ДПМНЕ денеска упати јавно прашање до претседателот на Алијанса за Албанците (АА), Арбен Таравари, за тоа кој е тој меѓународен фактор што бара оваа партија да стане дел од владината коалицијата.

Одговарајќи на новинарско прашање, портпаролот на ВМРО-ДПМНЕ, Наум Стоилковски, рече дека Таравари треба јасно и гласно да ѝ одговори на јавноста, а доколку не каже тоа значи дека има друга причина зошто сака да влезе во Владата.

„Доколку Таравари премолчи и не каже значи дека Таравари не е искрен и има друга причина зошто сака да влезе во Владата“, рече Стоилковски.

Ваквата прозивка до претседателот на АА од ВМРО-ДПМНЕ доаѓа откако тој синоќа во гостувањето во емисијата „Клик плус“ на ТВ 21 рече дека постои можност за влез на АА во Владата и оти тоа го бара меѓународниот фактор. Доколку и граѓаните го бараат тоа, рече Таравари, Алијанса би можела да стане дел од Владата.

Сепак, нагласи тој, засега нема конкретна понуда нема, но има постојана комуникација.

„Ако не станеме дел од Владата, тогаш одиме на избори. Нема друго решение. Сепак, приоритет за нас се уставните измени и затоа сме спремни да станеме дел од Владата за да го помогнеме процесот“, рече Таравари.

Лидерот на ДУИ, Али Ахмети, пак, денеска за оваа можност порача дека актуелното владино мнозинство е стабилно, но тенденцијата за негово зголемување е со цел создавање на една алијанса за Европа.