Владејачката ВМРО-ДПМНЕ ја обвини СДСМ и ДУИ дека го имаат заробено правосудниот систем и дека со години поставуваат кадри кои работат во нивен интерес. Партијата тврди дека Љупчо Коцевски, актуелниот државен јавен обвинител, треба да биде разрешен, нарекувајќи го „сијамски близнак“ на поранешната обвинителка Вилма Рускоска, судиите Добрила Кацарска и Илија Трпков.

Обвинувања за политизирано судство

Според ВМРО-ДПМНЕ, правдата во Македонија е под контрола на луѓе блиски до СДС и ДУИ, кои ги злоупотребиле своите функции за политички прогон.

  • „Ако Рускоска во обвинителството, а Кацарска и Трпков во судството беа поим за политизирана правда, тогаш Коцевски е нивниот сијамски близнак. Македонија се гуши во ‘дивото месо’ посеано од СДС и ДУИ, кое како канцер ја има зафатено правдата“, обвинуваат од ВМРО-ДПМНЕ.

Партијата наведува дека поранешната обвинителка Вилма Рускоска, заедно со судиите Добрила Кацарска и Илија Трпков, станале синоним за политички инструирано судство и обвинителство, алудирајќи на пресудите поврзани со настаните на 27 април 2017.

Коцевски под лупа – барање за разрешување

Според ВМРО-ДПМНЕ, Коцевски не само што е дел од политичката архитектура на СДС и ДУИ во судството, туку и незаконски поставува и разрешува кадри според политичката линија.

  • „СДС се против реформите во судството, затоа што нивните кадри се тие што ги носат клучните одлуки во нивна корист“, додаваат од партијата.

ВМРО-ДПМНЕ најавува реформи во правосудството

Партијата нагласува дека ќе работи на целосна реформа на правосудниот систем, нарекувајќи го „последното политичко упориште на криминализираниот дел од општеството“.

  • „Доаѓа време на правда и на реформи. Македонија нема да заборави кој ги газеше правдата и институциите!“, велат од ВМРО-ДПМНЕ.

Од партијата најавуваат конкретни чекори за прочистување на правосудството, а дали и кога ќе дојде до разрешување на Коцевски, останува да одлучат надлежните институции.