Внатрепартиски превирања во ЛДП: Зајкова уверува дека партијата дејствува независно, а тоа им пречи на одредени структури

Претседателката на Либерално-демократската партија (ЛДП), Моника Зајкова, ја отфрли критиката за зависност од други политички субјекти, нагласувајќи дека партијата „дејствува независно“, што според неа може да се види од поднесените закони, стенограмите, излагањата и гласањата во Собранието. Ситуацијата е тензична поради внатрепартиски превирања во ЛДП

Внатрепартиски превирања во ЛДП

На прашање зошто нема писмено известување за независното дејствување на ЛДП, која настапи како дел од коалицијата предводена од СДСМ, Зајкова изјави дека „јасно и видливо е дека ЛДП брани либерално-демократски политики“.

Сепак, изјавата доаѓа во момент на внатрепартиски превирања во ЛДП. Иницијативниот одбор за реформи ја обвини Зајкова за, како што велат, „непринципиелна и погрешна политика“. Според нив, претседателката на ЛДП повеќе се грижи за интересите на раководството отколку за интересите на граѓаните.

Реакција на Зајкова: „Одговорност за лошите наративи“

Во неодамнешна изјава за ТВ 24, Зајкова потврди дека Централниот одбор на партијата заседавал и дека се договорени идните чекори. Таа нагласи дека ќе се преземе одговорност за, како што рече, „лошите наративи и прозивки“ кои доаѓаат од одредени сопартијци и лица кои, според неа, немаат никаква врска со партијата.

• Барање за вонреден конгрес во ЛДП: Зајкова има уште 2 години мандат, тензии околу независниот курс на партијата или отчет за резултатот на изборите?

Најавена трибина за реформи во Битола

Противниците на Зајкова имаат свои планови.

Иницијативниот одбор за реформи во ЛДП најави трибина која ќе се одржи утре во Битола. Оваа иницијатива се толкува како обид за реструктурирање на партијата и отворен повик за промени во лидерството.

Политичка динамика: Двотретинско мнозинство на повидок?

Додека ЛДП се соочува со внатрешни судири, политичката сцена е раздвижена и од прашањето за можноста владата да обезбеди двотретинско мнозинство. Нивните потенцијални позиции околу уставните измени, особено во контекст на поддршката што Зајкова ја најави за предлогот на Мицкоски за „уставни измени со одложено дејство“, предизвикуваат дополнителни шпекулации.

Ситуацијата дополнително се усложнува по одлуката на Мендух Тачи да ја напушти коалицијата „Европски фронт“, што отвора простор за нови политички сценарија.

Судбината на коалицијата и иднината на ЛДП

Превирањата во ЛДП го привлекуваат вниманието на јавноста, особено поради можните импликации врз стабилноста на владината коалиција. Останува да се види како овие политички тензии ќе влијаат на поддршката за клучните прашања, вклучувајќи ги и уставните измени.