ДУИ во Чаир помпезно го најавува формирањето на „локален СПАК“, како да ја открила Америка, соопшти денеска коалицијата Вреди.
Но, прашањето што веднаш се поставува е: дали овој СПАК (албанска специјална антикорупциска структура) ќе го истражи и сопственото раководство или е само уште еден театар за измама на граѓаните, додава коалицијата.
„Корупцијата има познати лица: Фатон Ахмети, поради сомневања за злоупотреба на средства во ФЗО, Арбер Адеми, како министер за образование со отворени случаи за злоупотреба, Бујар Османи, за случајот „Пациент“ и многу други кои денес седат во раководството на ДУИ како недопирливи. Вреди го поздравува овој СПАК на ДУИ и сугерира дека, ако е навистина за акција, а не за спектакл, треба да ги почне истрагите токму со овие имиња. Првото нешто што треба да го направи е да воспостави комуникација со СПАК на Албанија и да побара екстрадиција на Артан Груби, симболот на ароганцијата и злоупотребата на моќ“, се вели во соопштението.
Ако овој СПАК е сериозен, се додава, нека се обиде да ги истражи сопствените недопирливи.
„Само тогаш граѓаните ќе веруваат дека транспарентноста не е фасада, туку реалност. Дотогаш, ова останува потсмев, СПАК за Фејсбук, а не за правда“, соопшти Вреди.