Исчезнувањето на Лидија Трајковска од Јурумлери, за која семејството пријави дека исчезнала рано утрото, влегува во својот втор ден без конкретни резултати. Последен пат е видена во близина на автобуска станица во Јурумлери, и оттогаш нема никакви информации за нејзината локација. Според семејството, Лидија ја напуштила куќата без мобилен телефон и лични документи.
Семејството бара помош за Лидија Трајковска: „Ова е несвојствено за неа“
Семејството на Лидија Трајковска е длабоко загрижено и бара поддршка од јавноста во потрагата за нивната сакана. Ќерката на Лидија, Мартина, објави јавен апел за помош преку социјалните мрежи, споделувајќи детали за нејзиниот изглед и последната позната локација:
-
„Исчезната е мајка ми. Последен пат е видена на автобуската станица во Јурумлери, облечена во зелен дуксер со црни шари, бели фармерки и црни чизми. Ако некој ја види, ве молам јавете се на 071345208,“ напиша Мартина во објавата.
Таа истакнува дека вакво нешто никогаш не се случило и дека ситуацијата е невообичаена и шокантна за целото семејство. Лидија, која работи во месарата на Тинекс, излегла од дома околу пет часот наутро, додека останатите членови на семејството спиеле.
-
„Таа е семејна жена, одговорна, секогаш навреме се враќа дома. Ова е голем шок за сите нас и не знаеме што да мислиме,“ додава Мартина, објаснувајќи дека веднаш по исчезнувањето случајот го пријавиле во полиција.
Полицијата продолжува да ја бара Лидија Трајковска
И покрај посветеноста на семејството и полицијата, досега не се појавиле нови водечки информации за Лидија Трајковска. Семејството добило неколку повици од граѓани кои тврделе дека ја виделе жената, но на крајот излегло дека станува збор за погрешна идентификација. Полицијата продолжува со истрагата и се обидува да добие дополнителни информации кои би помогнале во откривањето на нејзината локација.
Семејството повторно апелира до јавноста – секој што има било каква информација за Лидија Трајковска да се јави на споделениот контакт или да го информираат најблиското полициско одделение.