Вучиќ и Хил го отворија првиот лет на „Ер Србија“ од Белград кон Чикаго

Српската авиокомпанија „Ер Србија“ од денеска повторно воспоставува директен воздушен сообраќај меѓу Белград и Чикаго, по 30-годишен прекин.

Претседателот на Република Србија, Александар Вучиќ и американскиот амбасадор во Белград, Кристофер Хил, рано утрово со свечено сечење лента на „Никола Тесла“ официјално го отворија првиот лет на „Ер Србија“ за Чикаго.

Српската национална авиокомпанија ќе лета за Чикаго двапати неделно, во среда и во сабота, а од 12 јуни патниците ќе имаат трето неделно полетување во понеделник, соопшти Ер Србија.

Летовите од Белград до меѓународниот аеродром „О’ Хер“ во Чикаго ќе траат 11 часа, додека патувањето од Чикаго до Белград трае помалку, околу 10 часа. На оваа траса се поминува растојание од околу 8.000 километри.

Летовите ќе се вршат со авиони Ербас А330-200 од флотата на широколисни авиони на српската национална авиокомпанија. Новата линија е продолжение на деловната експанзија на српската национална авиокомпанија во САД, каде што веќе лета директно за Њујорк.

Ер Србија смета дека новата линија ќе значи и подобро поврзување на регионот со Чикаго, третиот по големина град во САД, по Њујорк и Лос Анџелес, каде што живеат голем број луѓе по потекло од овие краишта.