„Отворен Балкан“ е автентичен, заеднички процес на Македонија, Албанија и Србија, но иницијативата е отворена за сите земји во регионот. Договорите за единствен пазар на трудот во регионот се од огромно значење за граѓаните.
Ова денеска во Тирана го изјави премиерот Зоран Заев во обраќањето на состанокот на иницијативата „Отворен Балкан“, што почна утрово со работна средба на лидерите на иницијативата, премиерот на Албанија, Еди Рама, како домаќин, претседателот на Србија Александар Вучиќ и премиерот Заев. Поздравно обраќање на состанокот имаше и еврокомесарот за проширување Оливер Вархјеи.
– Од првата средба во Скопје во јули и првото потпишување на договорите, покажавме дека силната политичка волја може да се трансформира во брзо функционирање на нашите институции, што несомнено го покажува нашиот капацитет како земји за спроведување брзи, ефикасни и напредни реформи. Токму овој капацитет ќе го покажеме пред европските институции на патот на нашите евроинтеграции, посочи Заев.
Заев најави дека на состанокот во Тирана ќе бидат потпишани повеќе мултилатерални и билатерални договори во насока на реализација на основните права за слободно движење на луѓето, производите и капиталот, како дел од зацртаните придобивки за поголема регионална соработка и унапредување на поврзувањето меѓу земјите од Западен Балкан.
Во Тирана денеска ќе бидат потпишани Договорот за условите за слободен пристап до пазарот на трудот на Западен Балкан, Договорот за интерконекција за шемите за електронска идентификација на граѓаните на Западен Балкан, Договорот меѓу владите на Република Албанија, Република Србија и Република Северна Македонија за соработка во областа на ветеринарството, безбедноста на храна и фитосанитарната политика.
На овој Самит на „Отворен Балкан“ ќе се потпишат и билатералните договори за признавање на одобренијата за Овластен економски оператор за безбедност и сигурност меѓу Република Македонија и Република Албанија и меѓу Република Албанија и Република Србија.
Во делегацијата на состанокот во Тирана се и заменик-министерот за финансии, Димитар Ковачевски и заменик-министерот за земјоделство, шумарство и водостопанство, Трајан Димковски.