Заплена на 1,6 тони небезбедна храна во Чучер-Сандево
Агенцијата за храна и ветеринарство (АХВ), во соработка со Единицата за економски и компјутерски криминал при СВР Скопје, спроведе вонреден инспекциски надзор на подрачјето на Чучер-Сандево, при што беа запленети 1.641 килограм небезбедна храна. Контролата била извршена по добиена пријава за сомнителна пратка.
Храна без потекло и декларација
Во возилото биле пронајдени 1.060 килограми кршени ореви и 581 килограм кикирики во зачинета обвивка, двете во рефус-состојба и без документација за потекло. Во истата пратка биле затекнати и 900 килограми индиски ореви со декларација. Поради недостаток на соодветни податоци за потекло и квалитет, производите се прогласени за небезбедни и ќе бидат уништени во согласност со Законот за безбедност на храна.
Санкции и најавени засилени контроли
Против лицето затекнато при контролата е поведена прекршочна постапка за пуштање во промет на небезбедна храна и работење без регистрација, за што му е изречена глоба од 600 евра. Од АХВ најавуваат дека ќе продолжат со засилени контроли на терен, со цел заштита на здравјето на потрошувачите и спречување на продажба на небезбедни производи.