Новата рунда преговори меѓу Белград и Приштина започна во Брисел со заедничка средба на косовскиот премиер Албин Курти, претседателот на Србија Александар Вучиќ, европскиот комесар за надворешна политика Жозеп Борел и специјалниот пратеник на ЕУ за дијалог, Мирослав Лајчак.
Денешната средба меѓу претседателот на Србија и премиерот на Косово е најважниот момент во процесот на нормализација на односите во последните десет години.
Шефот на европската дипломатија Жозеп Борел, вечерва во Брисел, на почетокот на средбата со лидерите на Србија и Косово, изрази надеж дека тие ќе заземат конструктивен пристап.
Борел на Твитер, заедно со фотографии, напиша дека започнала заедничката средба со српскиот претседател Александар Вучиќ, косовскиот премиер Албин Курти и специјалниот претставник на ЕУ за дијалог меѓу Белград и Приштина, Мирослав Лајчак.
„На дневен ред е предлогот на ЕУ за нормализација на односите. Се надевам на конструктивен пристап од двете страни“, рече Борел.
Трилатералната средба започна нешто пред 18 часот. Борел и Лајчак претходно одвоено разговарале со Курти и Вучиќ, по што дошло до непланирана пауза од околу еден час, пренесува Бета.
Додека се одвиваше средбата меѓу Борел, Лајчак и Курти, српскиот претседател во Брисел се сретна со специјалниот пратеник на САД за Западен Балкан, Габриел Ескобар.