ЗАВРШИ ПРВИОТ КРУГ ВО БУГАРИЈА: Тесна трка меѓу Ѓуров и Јотова со рекордно ниска излезност

Централната изборна комисија на Бугарија официјално го објави крајот на изборниот ден во 21:00 часот по локално време, изјави претседателот на ЦИК, Георги Хорозов. Граѓаните на Бугарија денеска гласаа за избор на седмиот претседател на државата, а според првичните податоци од паралелното пребројување на гласовите, разликата меѓу кандидатите Андреј Ѓуров и Илијана Јотова е минимална.

Според агенцијата „Маркет линкс“, врз основа на 100 отсто паралелно пребројување, парот Андреј Ѓуров и Георги Кандев освоил 33,5 отсто од гласовите, додека за Илијана Јотова и Кирил Валчев гласале 32,7 отсто. На трето место според оваа агенција е кандидатската двојка Костадин Костадинов и Петар Волгин со 12,4 отсто. По нив следуваат Радостин Василев со 4,2 отсто, Ивелин Михајлов со 3,4 отсто и Иван Христанов со 2,8 отсто од гласовите.

Податоците од агенцијата „Мјара“ покажуваат дека Илијана Јотова и Кирил Валчев добиваат 35,6 отсто поддршка, додека на второ место се Андреј Ѓуров и Георги Кандев со 32,5 отсто. Кандидатите Костадин Костадинов и Петар Волгин имаат 12,4 отсто, по што следуваат паровите Радостин Василев и Красимир Манов со 4,3 отсто, Ивелин Михајлов и Јулијана Матеева со 3,5 отсто, како и Иван Христанов и Стојанка Черкезова со 2,2 отсто поддршка.

Агенцијата „Алфа рисрч“ исто така регистрира тесно водство на Илијана Јотова и Кирил Валчев со 34,6 отсто поддршка, пред Андреј Ѓуров и Георги Кандев кои освоиле 32,7 отсто. Кандидатскиот пар Костадин Костадинов и Петар Волгин добил 12,6 отсто, Радостин Василев и Красимир Манов освоиле 4,1 отсто, Ивелин Михајлов и Јулијана Матеева имаат 3,8 отсто, а Иван Христанов и Стојанка Черкезова се на 2,7 отсто.

Излезноста на гласачите на овие избори остана на исклучително ниско ниво, при што агенциите проценуваат одѕив од околу 22,2 отсто. Претходно, портпаролката на Централната изборна комисија Стојанка Балова соопшти дека излезноста до 16:00 часот во државата изнесувала само 16,04 отсто, што претставува пад во споредба со претседателските избори во 2021 година, кога до истиот термин гласале 24,12 отсто од запишаните избирачи.

Балова најави дека на 27 октомври Централната изборна комисија ќе ги соопшти официјалните резултати од изборите и имињата на победничката кандидатска двојка доколку некој обезбедил победа во првиот круг. Доколку ниту еден кандидат не ги исполни условите за победа, вториот круг од претседателските избори ќе се одржи на 1 ноември 2026 година.