Претставници на бугарските здруженија во Македонија побараа да бидат вклучени во работната група за уставните измени, јавува бугарската новинска агенција БТА, објави Макфакс.
Како што се наведува, во писмо до премиерот Димитар Ковачевски тие го поздравуваат создавањето на работната група, која ја оценуваат како чекор напред кон решавање на прашањето за вклучување на Бугарите во преамбулата на Уставот на земјата, со што се гарантираат правата и слободите на претставниците на Бугарите во земјата, според основниот закон.
Потписниците на писмото бараат од Ковачевски да предложи во работната група да се вклучат и претставници на Бугарите во Северна Македонија за да го дадат својот конструктивен придонес во работата.
„Бугарскиот народ беше најконструктивниот елемент во остварувањето на вековниот сон за независна, демократска и суверена Република Македонија, држава на сите граѓани што живеат во неа, без разлика на етничка, верска, политичка, општествена или која било друга припадност. Но, со донесувањето на Уставот на Република Македонија на 17.11.1991 година, а подоцна и со сите амандмани, беше направена голема историска неправда и бугарскиот народ беше изоставен од преамбулата на Уставот. Оваа историска неправда ќе се исправи за да ги уживаме сите права и слободи што произлегуваат од највисокиот правен акт заедно со другите народи веќе вклучени во преамбулата на Уставот на Република Северна Македонија за заедно да градиме подобра иднина во нашата земја во која живееме и заедно го чекаме денот кога ќе ја видиме како полноправна членка на ЕУ, а со тоа и како дел од прогресивниот западен свет“, се вели во писмото до Ковачевски, поддржано од претставници на 12 здруженија на бугарската заедница, пишува БТА.
Според пописот, во Македонија има 3.504 Бугари.