Украина е подготвена да соработува со земјите од Блискиот Исток за тоа како да се спротивстават и да го заштитат својот воздушен простор од иранските дронови „Шахед“, изјави украинскиот претседател Володимир Зеленски на денешниот брифинг.
„Утрово разговарав со лидерите на ОАЕ. Покрај нашите дипломати кои работат на различни нивоа со претставници на земјите од Блискиот Исток, верувам дека во наредните денови ќе разговарам со секој од лидерите на овие земји кои бараат соработка. Без сомнение, најважното прашање за сите е како да се спротивстават и да го заштитат својот воздушен простор“, рече украинскиот претседател.
Зеленски истакна дека Украина, повеќе од кој било друг, разбира што значат масовните воздушни напади и е подготвена да го сподели своето искуство. Сепак, Украина нема капацитет да помогне со оружје или да обучи тимови додека продолжуваат нападите од големи размери врз Украина, додаде тој во исто време. (МИА)