Земјите од Западен Балкан ја надминаа Македонија според индексот на владеење на правото, Македонија падна за четири места

Според најновиот Глобален индекс за владеење на правото што денеска го објави Проектот за правда во светот, Македонија го задржа рангирањето на 67 место меѓу 142 земји со оценка од 0,53, исто како и во претходните три години.

Кога станува збор за критериумите за ограничување на владините овластувања, Македонија е на 97 место со оценка 0,47. Во однос на отсуство на корупција, земјата е позиционирана на 75 место со индекс 0,45. Во однос на владината транспарентност, Македонија е на 70-то место со оценка 0,50. Во однос на основните права, земјава е на 56. позиција со оценка 0,60.

По ред и безбедност, Македонија е на 43-то место со оценка 0,80. Во однос на регулаторното спроведување, земјата е позиционирана на 94-то место со индекс од 0,46. Во однос на граѓанската правда, Македонија е на 75. место со оценка 0,52. На крајот, во однос на кривичната правда, земјата е на 72-то место со оценка од 0,44.

Во споредба со минатата година, иако резултатот останува ист, Македонија забележа пад од четири места и сега го дели истиот ранг со Монголија, Казахстан, Индонезија и Молдавија.

Од земјите од Западен Балкан, подобро рангирање на вкупната листа имаат Црна Гора и Косово, на 57, односно 58 место, со оценки од 0,56. Босна и Херцеговина е послабо на 75 место со индекс 0,51. Албанија и Србија се рангирани на 91 и 93 место со 0,48, соодветно. Турција е на 117. место со оценка 0,41.

Во рамките на ЕУ, Унгарија е единствената земја членка со послаб ранг од Македонија, позиционирана на 73 место со оценка 0,51. Највисоко рангирани балкански земји во ЕУ е Словенија на 27 место со 0,69, а потоа Романија на 40 место со 0,63. Хрватска и Грција се рангирани на 45 и 47 место со 0,61, соодветно. Бугарија е на 59 место со оценка 0,56.

Во споредба со минатата година, Бугарија и Словенија имаат најголем раст меѓу членките на ЕУ, а Грција и Белгија имаат најголем пад. Белгија моментално е рангирана на 16-то место со оценка 0,78.

Првите две позиции на листата ги држат земјите-членки на ЕУ Финска и Данска, со оценки од 0,84 и 0,83, соодветно. Норвешка исто така ја дели истата оценка од 0,83, потоа Шведска и Австрија со 0,79 и Германија со 0,78. Сингапур е седми со 0,77, а потоа следат Јапонија (0,76), Естонија (0,75) и Холандија (0,74).

На дното на листата, Венецуела е на 142. место со оценка 0,27. Следуваат Камбоџа со 0,31, Авганистан со 0,32, Хаити и Демократска Република Конго со 0,34 и Никарагва, Египет, Мјанмар и Камерун со 0,35.